Leej Ntxhais Zoo

Subject: Leej Ntxhais Zoo Tue Aug 24, 2010 9:19 am

Leej Ntxhais Zoo

Leej ntxhais zoo nws yeej mloog lus,
Coj siab tus rub lub siab ntev,
Nyob hauv tsev mloog leej niam hais,
Sawv ua tshais, ua su, ua hmo,
Yeej tsis tos leej niam txib li,
Nyob luag ntxhi tsis pub niam txhawj,
Nws yeej txawj hlub txiv thiab niam,
Yeej tsis tshiam niam txiv ib zaug,
Tsis tau npau ua tshej muag dub,
Niam yeej hlub nws tshaj plaws li,
Yeej tsis ntxhi tsis nyiam taug xaiv,
Niam me maiv niam ua siab loj,
Kev ua noj nws yeej tsis txhawj,
Nws yeej txawj tsis tag yuav qhia,
Li no tiag yog ib leej ntxhais zoo,
Lub koob moo thiaj nrov ncha lug,
Tias ibtug ibleej ntxhais zoo,
Yeej tsis nroo tsis xam khib li,
Ua luag ntxhi hais lus mos nyoos,
Yeej tsis nroo rau leej twg hnov,
Lub suab nrov me lus qab zib,
Nws kuj dib tau Hmoob tej tub,
Lub siab hlub vim nws lus mos,
Thiab kuj yog ib leej ntxhais zoo,
Muaj koob moo tias nws yeej nquag,
Txhua tus qhuas nws ib leeg tshaj,
Luag thiaj tham nws lub koob zoo,
Tias muaj hmoo tau ntsib ib leej ntxhais zoo no tiag…, lawv aw.

Subject: Re: Leej Ntxhais Zoo Tue Aug 24, 2010 11:18 am

Ib leeg Ntxhais Zoo

Ib leeg ntxhais yuav zoo
Yuav yog nws niam cob thiab qhia
Xyaum mloog lus thaum me me tuaj
Niam thiaj xav txib thiab xav qhia
Txhob yws taus..txhob xam khib..xyaum nquag
Niam txib vim niam xam kom nws txawj
Thaum nws loj mus ua nyab thiaj ua tau ib leej nyab zoo
Thiaj tsis raug niampog txivyawg cem thiab thuam

Ib leeg Ntxhais Zoo

Xyaum hais lus zoo txhob nthe nrov nrov...xyaum hais lus mos lub muag
Xyaum tham lus luag ntxhawv txhi...txawm chim los uv kom dhau luag nyav rau
Txawm luag cem thiab nthe nws....nws xyaum ua siab ntev teb lus zoo lus mos
Luag hnov luag thiaj qhuas tias nws coj tus coj tau zoo
Hluas nraug Hmoob pom luag thaj nyiam thiaj xav sau coj mus ua neej kom dhau ib tiam

Subject: Re: Leej Ntxhais Zoo Tue Aug 24, 2010 3:31 pm

Wow!

Nkauj Nyiag, tus me ntxhais no mas ntxim hlub thiab zoo nkauj heev li os. Saib nws lub me plhu thiab ob lub me qhovmuag mas cas yuav phim cov lus zoo koj hais ua luaj li tiag.

Zoosiab tau ntsib koj hauv no thiab mog.

Subject: Re: Leej Ntxhais Zoo Tue Aug 31, 2010 10:11 pm

Nyob zoo os sis Lubpajzoo,

hehheee...lam sau xwb...ua tsaug koj qhuav kuv os...

Subject: Re: Leej Ntxhais Zoo Thu Sep 02, 2010 5:15 pm

me vivncaus aw, kuv los lam sau thiab xwb mas es zoo siab koj tuaj nrog kuv sau os.

Kev yuav ua tau ib tug ntxhais zoo ces yeej muaj li koj hais saud mas mog.

Leej ntxhais zoo ces nws yeej mloog lus dua. Niam qhia thiab tsis qhia los nws yeej kawm tej lus zoo thiab nws yeej tsis cem leej niam yeej tsis twv leej niam li. Nws fwm nws niam nws txiv, nws tej nyab tej nus, thiab nws tej neeg txheebze txhua tus li.

Nws tsis tawv ncauj, nws niam thiab nws txiv txib los nws yeej sawv tsees mus ua xwb tsis cav ncauj li. Nws tej nyab tej nus txib los nws mus pab luag ntxhi xwb.

Leej ntxhais zoo ces tsis tag yuav siv zog cob qhia li, nws saib luag tej haujlwm yam zoo ces nws yeej kawm los ua rau nws lub neej lawm.

Leej ntxhais zoo ces txawm nws mus ua nyab lawm los nws lub neej yeej zoo dua vim nws twb mus ua tau ib leej nyab zoo lawm thiab.